KISOH AMING

Ayoh ye kate doh tok bolih ikut. Ye nok ikut gok . Pah tu dalang sejid wat bising. Ye berembah ngan abang dia. Bising Bango. Ayoh dia hok tengah mayang ni nok maroh dok tau ahh. Geletik tangang rasa nok bui penampor sutir. Orang laing kiri kanang dalang sof mok’o rase gitu jugak, mesti dok kusuk semayang. Kalu ye maghi dekat, bulih junga tangang, belang-belang bace fatehoh, mesti kena keppok pale, baru ye bulih dudok diang. Base anok dok rajing mari sejid, ye ingat sejid ning macang padang tepat maing. Ye berembah, ye berembah jugak nge abang dia. Nok buwak gane , budok dua taung , dok tahu ke mende. Orang paka baju melayu nok gi sejid, ye derah-derah gi ambek baju retek dalang robok. Tak dok pioh, ye buke abih sorok dalang rumah cari pioh, bulih ke dia pioh besar, paka jugak, paka jugak walaupung dok lekat di pale. Tengelang separuh dahi napok butir mate je dua butir, kelit-kelit. Ayoh ye kate “Aming doh ayoh gi ahhh, kek gi aming bising, dok dudok diang, kaca orang mayang”. Panda ye jawak “Aming uduk je, Aming diang je, Aming mayang nge ayoh”. Uhh, jawak bukang maing juruh. Ayoh dia pong ajoklah, nok try ,bulih ke dok dia duduk molek-molek mase orang semayang jumaat. Kalu dok ajok kang ye nangis guling hanyar depang mok dia, sapa orang abih mayang. Rohoklah mok dia nok suruh senyap kekgi. 

Mase khetbah tu ye start doh, iyah-iyah ye fire ke abang dia. Abang ye senyak je, dok layang. Ayoh ye tengok dari jauh, pah tu cerelong ngan wat mulut cettum gitu. Marohlah tu .Ye senyak kejap. Pah tu ye segok-segok pulak abang dia, iyah-iyah, koya jadi ultrameng lawang raksakse. Ayoh ye cerelong lagi, ambek jari tunjuk bubuh dekat nge bibir, wat gerok kiri kanang. Perit meto , takutlah tu konong. Derah-derah ye gi duduk bira abang dia, terkising-kising senyung. Dok dan dua minit ye segok pulak abang dia, maing pogong-pogong pulak, iyah-iyah..

Ayoh dia buat isyarat ke abang dia ,suruh maghi dekat. Ayoh dia bisik “koho teruk adik mung ning, mung ajok adik mung gi blakang, tepat orang buh lipar nung, mung layang ye berembah, kot panda ye ah nok begocoh ke, nak berguling ke, nok teranding di dinding ke.Dok bolih jadi gining, ye kaca orang nok mayang kekgi.” Abang dia ajoklah gi blakang. Ye pong derah-derah ikut.

Amanglah sementor. Bulihlah dengar khetbah molek skit. Tok imang perabih khetbah dia, pas tu sedia nok semayang. Pah takbir je , bace patehoh, eh-eh tubik mari duane dok tahu, ye mari pulok nge abang dia. Duk selit celoh sof. Ye akat takbir jugak pah tu wat mulut bebet-bebet, pecih-pecih, pecih-pecih bunyi, bace mende dok tau. Ekseng je lebih.Mase abang dia sujud ye buwak pulok, tengok molek ngat abang dia sujud, kabat lallu atah blakang wat macang kuda. Keduk-keduk , bising bango. Mase abang dia duduk , ye pelok tekok abang dia , lepah tunju dua tige butir, debih-debih bunying. Gitulah sapa orang abih semayang.

Lepah bagi salang, kiri dan kanang, ayoh dia cerrelong slalu, bulat gete mate dia macang nok sembul , maroh tahap gajah naik minyok. Ye kejut ke mate sembul ayoh dia , Ye lari gi nusuk blakang abang dia, tahu nye saloh sebab ayoh ye pesang benor doh jangang wat bising dalang sejid. Ayoh dia saoung slow-slow “Sape maing masae mayang takdi hahhh ?”. Dalang takut-takut dia jawak “Bukang Aming”. Kebetulang tok imang tengah bace doa lepah mayang, tok makmung pulak jawak rama – rama “Aminggggg”. Ye kejut , watpe semua orang kata Aming. Ayoh dia kate lagi “Sape bising bango main gocoh dalang sejid hahhh” . Tok Imang bace doa .Makmung jawab aminggggg. Ye pucat lesi doh muke, ye jawak “Bukang Amingggggg, bukang Amingggg.. muke paling kiri kanang tengok ke makmung, mintak kasihang belas. Abang dia doh dok tahan suke tengok keaadaang dia hok pucat lesi. Ayoh dia wat lolok tanye lagi “ sape hok maing berembah dalang sejid ahhhh?”. Tok Imang perabih doanya, hok akhir dia kate “Ya Rabbal Alaminnnnnn”, kuat skit dari biase. Makmung-makmung sume pakat perabih amingkan doa tok imang, kate kuat skit dari biase “Amin Ya Rabbal Alamin”. Ye kejut hanyar. Bukang Aming, Bukang Aming, selok ye nangis takutan. Makmung sume tengok ke dia . Derah-derah Ye gi jerba ke ayoh dia. Reboh nungging ayoh dia sapa sellok kaing-kaing. Abang dia dok tahan, suke sampai guling bating depang sof.

Mase tok imang tubik dari sejid nok ambek lipar, abang ye tunjuk ke aming guane rupe tok imang, Aming cerat molek, paka serbang macang bakul, paka juboh serebeh, paka spek mate awe-awe itang, misa nipih siak, janggut panjang jengong. Koho abang ye ngusik, tok imang nok ambek Aming, koho ye takutan. Peluk kemah keming ayoh ye, dok lepah-lepah.

Tekkang ayoh Aming, nok kilah kain hok sellok takdi lagi, nok ambek lipar cap beng teng Aming lagi, nok gaga kuci kete lagi dalang kocek. Macang orang ngandung lah pulok sebab aming dok gatung depang. Nok gohek kete pong dok leh, dok gendong gitu ah depang stereng. Puah ayoh ye pujuk, gitu gining, dok makang siku gok.Nok dok nok , ayoh ye tebeng gohek gok kete dia koho-koho. Aming pulak sebek, sok sek lagi bunying. Jebek muke-muke, dok tekek nge ayoh ye. Pale macang nok masuk dalang baju ayoh ye. Nge ingus, nge air mate, nge air idung, nge air lior, penoh jeluah di baju ayoh ye. Ayoh ye pulok , lengoh gok ah pehe, serebang kaki-kaki duk gendong ke Aming.

Kete pulok skali gi bira, skali gi tengoh, bewang-bewang kiri kanang macang ulo lari masuk dalang rok. Kete blakang dok tau ah, ping-pong,ping-pong, tekang ke hong. Doh, gohek kete doh ah koho, pah tu bewang pulok, maroh ah orang alik lakang. Parok ah gining. Molek je kete ye gi bira, pitah kete laing dari blakang nung, dang gi saoung “Guane boh, bawak kete ke, bawok keh”.

Hija muka ayoh ye malu. Rase nok nusuk bowoh kuseng kete je. Mari pulok hok laing ,soung lagi ,

“mende bawok kete gining ee, kete labbi laju agi.”

Biru stor pulok muka ayoh ye, wase nok masuk dalang desbok pulak. Ayoh ye, nok dok nok ,wat isyarat mulut, mucung ke Aminggg pah tu wat muke sebek tiru muke Aming. Drebar sebeloh ngangguk-ngangguk wat pahang, pah tu ngiling pale dia.

“Berat nanang….”,

tubik dari mulut dia. Ade lagi kete pitah, saoung pulok

“wane bawok kete bewang kalli ning, mung mabuk tape ke, kite nok pitah pong susoh”. Bila ye junga pale, kelih ke Aming tengoh peluk kemah keming nge ayoh ye, pompongang poseng, tapi dang agi wat ulasang siarang langsong.

“La dalang kete pong dukong gok,peseng nape gining ing, sakit tayya”.

Ayoh ye wat kerising kenyih gitu ahh, tahang malu. Skali junga kirri, skali junga kanang , sakot pale Aming nok kelih depang dok leh. Pulah cawah skali nok ke nyapa . Koho-koho, koho-koho sapa jugak drumah. Nyada ayoh ye, kenaling, lembik lokli, leloh bedoho layang ke Aming. Naik drumah , bahang nasik tige pinggang, bulurang, air teh O beng pulok abih secetong nye tibang.

Jok kejadiang di sejid kena ke Amingg, ye lame doh dok ikut ayoh ye gi sejid, tok imang maroh ke Aming, ye kate. Ayoh ye maghi mikkir, kalu gining sokmo, rohok ning. Pah ke besor dok gi sejid. Kekgi lambor sejid pong dok kenal. Petang-petang ayoh ye wat raoung , newar-newar bira rumoh tok imang. Tok imang ngenne gok nge ayoh Aming,napok je ayoh Aming gendong motosikal, ye klo slalu, tangang pulok kibor kiri kanang, Aming kelih ke tok imang, ye cang ke spek mate awe-awe itang tok imang, napok ke tangang tok imang macang nok debih je , naoung pulok situ le. Ayoh Aming derah-derah wat gi newor tah kelaing dulu.

“Smulah ayoh aji, kekgi ambe maghi mulla, serung ke ayoh Aji ning.”

Ayoh Aming kabo ke tok imang belang-belang tunjuk ke Aming hok tengoh nangis bederohong.

Tok imang wase pelikkan, wane pulak takut ke ambe ning, ke takut ke spek awe-awe itang ambe, ke kilah kaing tinggi ngat ,dokpong takut ke rambut reseng ambe sebab turung takdi dok dang nok bojeng. Kelih atah bawoh, blakang depang wasaang come doh , takut maccang ke ambe.

Dok lame pah tu ,maghi pulok lah ayoh Aming. Tok Imang dok sille molek doh atah gere nge mok aji. Siak nge sekut meri, nge air kawe. Angin pulok puh,puh tiup. Sedak nguh wasaang tok imang. Aming napok nakut lagi. Dukung dok lepah nge ayoh ye. Tangang pegang kelat gang. Hoh, kene kelat gang gok, dok ketek ah Aming, memang berehi. Dok dulli doh ke tok imang. Mok Aji depong Aming wat gi duduk atah gere pah tu layang Aming makang kelat gang belah kanang.

Tok imang ambek tepat belah kiri, jurung kalli kat papang jokel. Dok dekat-dekat kang nangis pulok budok Aming ning. Sudoh bebase tertib terning satni tubiklah soalang tok imang

“doh guane gamok budok ning, nakkut pa gitu seme, macang ah kite ni hantu polong, kelih kite sapa nolong berderohon".

Ayoh Aming pong critalah ke tok imang, hal Aming dalang sejid ari tu, tengoh-tengoh crite tok imang camek sekut meri, kecak air kawe, pah tu buh mula atah gere. Ambek sekut meri , cicoh air kawe, puwak dalang mulut. Dok maing gitu ah .

Ayoh Aming ni gok crite bukang maing sedak, nge tangang nge kaki , nge lipar jepung abih naik atah palle. Sapa ke bab aaaaming, bukang Aming! , aaaaming, bukang Aming! , tok imang suke sellok sampe tebelohok. Kembur abih biskut meri, tupah air-air kawe. Pah ke air dalang talang pung abih telerak , hanyar banyar, kubang lembang abih. Mok Aji dari takdi dok bang dengor jugak cerita Aming, nge Mok-mok Aji suke selok jugok .

Ye ulang “aaaaming”, Tok Imang tukang jawak “bukang Aming!.” Pah tu pakat suke dua orang tu sapa gegor tubuh-tubuh. Dok sedor ye dok bira ngat doh. Duk gegor – gegor gitu, dok sedor kayu jokel tu patoh riok , prakkk bunying, kanja tok imang dok dang nok wat mende , tok imang jatoh sengbam beloh kiri , muke bahang di akor mottan tepi gere, pecoh spek awe-awe itang tok imang.

Mok Aji kejjut kelih ke tok imang jatuh jerebab gitu, dok sedor kayu papang gere tu jettak , bidah ke dia pulok . Cokeng naik papang tu, jadi macang papang gelosor , Mok Ajie pulok golek koho-koho, jatuh beloh kanang nge Aming-Aming kali kelecak tah bowoh. Tungging langgang skali. Abih tepek kelat gang di idung, manjang sapa linge. Ye terrik mok’o mase jatuh takdi. Ayoh Aming pompongang , saloh aboh, nok suke ke , nok sedih tengok keadaang tok imang nge mok ajie.

Tok Imang duk kerah situ nge spek awe awe itang pecoh sebeloh , duk tepi akor mottan tengoh gegor lagi tahang suke, sapa dok rok nok bangung. Mok Aji dalang kemama – kemama , wat selambe dok tau je, derah derah bangung cegat, belang-belang dukong Aming. Duk lame-lame guling gitu napok seksi ah pulok. Aming dok dang nok nangis , sebab Mak Ajie derah-derah akit ye. Ye suke glekek tengok kelat gang lekkat di muke mok Ajie. Air mate Mok Aji bera lagi , bukang sedih , sukaang. Ayoh Aming wat lolok tanye tok imang

"doh guane ayoh aji, sakit ke dok?, sakit duane ?”.

Tok Imang jawak wat gurra

“ Sakitt ahhh, dua tepat ambe sakit, se tali perut , rase macang nok putuh, se lagi buah pinggang , sbab rase nok keccing. Aming oh aming mung punye hal lah ning sapa pecoh abih spek awe awe itang ambe….”

ngeloh tok imang. Aming dang lagi bang dengor jawak lalu

“Bukang Amingggg!…